Бројот на загинати во земјотресите во Мјанмар се искачи на 144, хунтата со апел за меѓународна помош

Бројот на загинати во разорниот земјотрес во Мјанмар се искачи на 144, а стотици други се повредени, изјави денес лидерот на хунтата, високиот генерал Мин Аунг Хлаинг, со апел за меѓународна помош, јавува Анадолу.

Во телевизиско обраќање, лидерот на Мјанмар, исто така, предупреди дека бројот на жртви може да се зголеми бидејќи земјотресите предизвикале огромна штета на инфраструктурата.

„Бројот на загинати во земјотресот со епицентар во Мандалај достигна 144, а 732 се повредени“, рече Мин Аунг Хлаинг.

Тој побара меѓународна помош додека напорите за спасување и пребарување во погодените региони се во тек.

Во Тајланд најмалку 6 лица загинаа, додека 117 се заробени или исчезнати по уривањето на облакодер во Бангкок по силниот земјотрес со магнитуда од 7,7 степени со епицентар во подрачјето на Сагаинг, во Мјанмар.

По првиот потрес следеше земјотрес со магнитуда од 6,4 степени, 12 минути подоцна, според Геолошкиот институт на САД.