Selen Temizer
06 Ноември 2021•Ажурирај: 08 Ноември 2021
БРИСЕЛ (АА)
- Селен ТЕМИЗЕР
Ахмед бин Абдуррахман, 68-годишен Мароканец, за бездомниците во Брисел, главниот град на Белгија, ја отвори вратата на својот хотел и со личниот автомобил оди во домовите и им дели леб на луѓето што имаат потреба, а вели дека го прави само она што му го наложува исламската религија, јавува Агенција Анадолија (АА).
Абдуррахман веќе 27 години управува со хотел во една од помалите улици што водат до туристичката атракција „Гран Плас“ во самиот центар на Брисел.
Роден во градот Тангер во Мароко, Абдуррахман по доаѓањето во Белгија неколку години работел во ресторан во истата улица. Многумина во Брисел го познаваат, а посебно е ценет поради својата весела природа и карактерно однесување, како и поради хуманитарните активности во кои често учествува.
Абдуррахман, кој зборува англиски со течен американски акцент, зборува точно седум јазици, а пред да живее во Белгија некое време живеел и во Сан Франциско.
- Човек со богато животно искуство
Станува збор за сестран човек со богато животно искуство, кој свири пијано, пропатувал многу земји, од Русија до Јапонија, за да запознае различни култури, а имал прилика да запознае бројни светски лидери.
Абдуррахман споил два стана што ги купил во Брисел и изградил дом во препознатливиот дух на архитектурата на Северна Африка, а потоа објектот го претворил во хотел чија врата ја отворил за луѓето што имаат потреба од престој.
Неговиот хотел досега го посетиле бројни премиери, министри, членови на кралски семејства и амбасадори во Белгија. Абдуррахман гордо ги покажува фотографиите со светските лидери што ги чува на ѕидот на хотелската рецепција.
- Хуманитарец и муслиман
Абдуррахман во разговорот за АА кажа дека во секојдневниот живот постојано ги следи наредбите и упатите на религијата ислам на која ѝ припаѓа.
„Горд сум за тоа што сум го направил за луѓето во неволја. Јас сум хуманитарец, јас сум муслиман“, кажа тој.
Во неговиот хотел пред шест-седум години престојуваа претежно Сиријци, а имало и луѓе од Ирак, Еритреја, Авганистан и од северот на Африка.
„На бегалците што беа во хотелот им давам и храна. Ги носам во болница. Исто така им кажувам дека ни тука не е рај. Има и такви кои се враќаат во татковината. Јас ги испраќам до авионот“, кажа Абдуррахман.
Тој вели дека го повикале службениците од Центарот „Петит Шато“ во Брисел, група федерални агенции задолжени за прифаќање на барателите на азил во Белгија, и додава дека со своите постапки, на некој начин го дели товарот со таа институција.
Хасан Јусуф, еден од бездомниците, кажа дека во Абдуррахмановиот хотел престојува две недели, дека имал операција на ногата и дека поради пандемијата со коронавирусот не може да најде работа.
- Им помага на мигрантите
Абдуррахман во последните шест години навечер заминува во неколку пекарници од каде што собира производи што не се продадени од тој ден, па ги става во своето луксузно возило. Потоа до полноќ ги посетува мигрантите што во јавноста се познати како „луѓе без документи“ и кои со години живеат во Белгија, но немаат работна или дозвола за престој.
Мигрантите кои знаат кога доаѓа Абдуррахман, вообичаено го чекаат пред домовите во кои моментално престојуваат.
Ахмед Мухамед, еден од мигрантите, кажа за АА дека Абдуррахман веќе одамна им помага.
„Тој истрча да им помогне на луѓето дури и во текот на пандемијата на коронавирусот. Тој е многу добар човек. Бог да го награди за неговото добро дело“, рече Мухамед.
Абдуррахман вели дека тоа што им помага на луѓето го одржува во форма, напоменувајќи дека иако има 68 години, се чувствува многу младо и витално.
- Сака да се запознае со Ердоган
Запознал бројни светски лидери, а би сакал да го запознае и турскиот претседател Реџеп Таип Ердоган.
„Да бидам искрен, многу го сакам Ердоган. Слушнав колку убаво го учи Куранот. Паметен е и добар човек. Би сакал да го запознаам еден ден“, рече Абдуррахман на крајот на разговорот.
