Билансот на убиени Палестинци во израелските напади врз Газа достигна речиси 43.400

АНКАРА (АА) - Најмалку уште 33 Палестинци се убиени во немилосрдните израелски напади врз Појасот Газа, со што вкупниот број на убиени од минатата година достигна 43.374, соопшти денес Министерството за здравство во енклавата, јавува Анадолу.

Во соопштението на Министерството се додава дека околу 102.261 лице се повредени во тековните напади.

„Израелските сили извршија три масакри врз семејства во последните 24 часа, при што се убиени 33 лица и 156 се повредени“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да дојдат до нив“, се додава во соопштението.

Непочитувајќи ја резолуцијата на Советот за безбедност на Обединетите нации, со која се повикува на итен прекин на огнот, Израел продолжи со својата брутална офанзива врз Појасот Газа од 7 октомври 2023 година.

Поради израелската офанзива врз Газа е раселено речиси целото население на енклавата, а тековната блокада доведе до сериозен недостиг на храна, чиста вода и лекови.

Напорите за посредување предводени од САД, Египет и Катар за постигнување договор за прекин на огнот во Газа и размена на заробеници меѓу Израел и Хамас не успеаја поради одбивањето на израелскиот премиер Бенјамин Нетанјаху да ја запре војната.

Израел е обвинет за геноцид пред Меѓународниот суд на правдата за неговите акции во Газа.