Билансот на загинати во индиските воени напади врз Пакистан порасна на 31

КАРАЧИ (АА) - Пакистанската војска денес потврди дека најмалку 31 лице е убиено во индиските ракетни напади на пакистанска територија и во прекуграничниот оган по должината на Линијата на контрола, де факто границата меѓу двете земји, јавува Анадолу.

Бројот на повредени се зголеми од 46 на 57, изјави портпаролот на војската, генерал-потполковник Ахмед Шариф Чаудри, на прес-конференција.

Доцна синоќа Индија ја објави „Операција Синдор“, велејќи дека погодила „терористички инфраструктури“ на девет локации во Пакистан.

Ескалацијата меѓу соседните земји што поседуваат нуклеарно оружје настана по нападот на 22 април во Пахалгам, Кашмир, кој е под индиска администрација, во кој беа убиени 26 лица.

Индија го обвини Пакистан за нападот, тврдејќи дека имало прекугранична поврзаност. Пакистан негираше вмешаност и повика на неутрална истрага.

Индиските власти рекоа дека Њу Делхи го искористил своето „право за одговор и спречување на натамошни вакви прекугранични напади“.

Пакистан соопшти дека соборил пет индиски борбени авиони и дека „го задржува правото за одговор“.

Индија сè уште не издаде официјална реакција на пакистанската изјава за соборувањето авиони.

- Исламабад подготвен за истрага -

Министерот за одбрана на Пакистан, Хаваџа Асиф, изјави дека земјата е подготвена за независна истрага за наводното присуство на „т.н. терористички кампови“ на нејзина територија, како што тврди Индија.

„Подготвени сме и за независна истрага за ова прашање, како и за инцидентот Пахалгам. Апелираме до меѓународната заедница да ја истражи (вистинитоста на тврдењето за) 'т.н. терористички кампови' (наводни цели на Индија)“, рече Асиф во интервјуто за пакистанскиот радиодифузер „Џео њуз“ вечерва.

Пакистан, рече тој, има право да одговори по индиските воени напади, но „за разлика од Индија, ние никогаш нема да целиме кон цивили“.