БРИСЕЛ (АА) - Белгискиот премиер Барт де Вевер синоќа во говорот пред Парламентот повика на посилна и пообединета Европа по неодамнешните тензии околу Гренланд и ставот на САД кон своите сојузници, јавува Анадолу.

„САД се најсилни, но нашето достоинство не е на продажба. Ние не сме робови“, рече тој.

Говорејќи пред состанокот на лидерите на ЕУ во Брисел, Де Вевер рече дека неодамнешните случувања ја истакнале стратегиската ранливост на Европа и итноста од зајакнување на нејзината автономија, објави јавниот сервис РТБФ.

Тој ги даде овие изјави по учеството на Светскиот економски форум во Давос, Швајцарија, каде што американскиот претседател Доналд Трамп објави дека е постигната рамка за потенцијален договор што ги вклучува Гренланд и поширокиот Арктички Регион.

Тој рече дека Европа за малку избегнала „вистинска катастрофа“, додавајќи дека оваа „епизода“ треба да послужи како повик за будење.

„Ние Европејците мора да бидеме подготвени да издржиме бури и да стоиме сами“, рече тој, повикувајќи на побрз напредок во одбранбената соработка, интеграцијата на пазарите на капитал и зајакнати механизми за соработка во рамките на ЕУ.

„Дури и да не е за утре, мора да забрзаме“, додаде тој.

Лидерите на ЕУ се состанаа во Брисел за да разговараат за развојот на настаните со Вашингтон по тензиите предизвикани од интересот на Трамп за Гренланд поради неговата стратегиска арктичка позиција, изобилството на минерални ресурси и растечката загриженост од руското и кинеското влијание во регионот.

Во разговор за РТБГФ белгискиот министер за надворешни работи Максим Прево рече дека глобалната доминација на САД се совпаѓа со стратегиската слабост на Европа.

Тој рече дека распоредувањето европски трупи на Гренланд бил погрешно сфатен од Вашингтон како антиамерикански потег, нагласувајќи дека намерата му била да ги увери САД и да ја реши безбедносната загриженост за Арктикот поврзани со Кина и Русија.

Превот ја поздрави одлуката на Трамп да се откаже од заканата за дополнителни царини за европските земји, нарекувајќи ги таквите мерки „неприфатливи“, предупредувајќи дека паузата може да биде привремена поради „непредвидливоста“ на Трамп.

Тој рече дека ЕУ мора да подготви планови за пропорционален одговор, вклучително и економски контрамерки доколку е потребно.