ИСТАНБУЛ (АА) - Американскиот претседател Доналд Трамп рече дека НАТО треба да биде „тестирано“ како одговор на илегалната миграција на јужната граница на земјата, повикувајќи се на член 5 од принципот на колективна одбрана на алијансата, јавува Анадолу.

„Можеби требаше да го ставиме НАТО на тест: повикување на член 5 и да го принудиме НАТО да дојде тука и да ја заштити нашата јужна граница од натамошни инвазии на илегални мигранти, со што ќе ослободиме голем број агенти на граничната патрола за други задачи“, порача Трамп преку неговата платформа Truth Social.

Неговите коментари дојдоа откако тој изрази критики дека НАТО не застанува целосно зад САД, по забелешките на лидерите на ЕУ на Светскиот економски форум (WEF) во Давос, Швајцарија, кои го критикуваа обидот на Вашингтон да го купи Гренланд.

„Проблемот со НАТО е што ние би биле тука за нив 100 проценти, но не сум сигурен дека тие би биле тука за нас“, коментираше Трамп во средата.

Сепак, по учеството на 56. годишен состанок на СЕФ во Давос, Трамп понуди пооптимистичка оцена враќајќи се од Швајцарија во Вашингтон.

„Се враќам во Вашингтон. Супер си поминав во Давос. Се работи на структурата на Гренланд и тоа ќе биде неверојатно за САД, а 'Одборот за мир' е нешто што светот никогаш порано не го видел, многу посебно“, напиша тој на Truth Social.