Бајден: „Светот е пообединет по гласањето во ОН со кое се осудува руската анексија на делови од Украина“

ВАШИНГТОН

Светот е пообединет и порешителен по гласањето во Генералното собрание на Обединетите нации со кое се осудува нелегалната анексија на украинските региони од Русија, а за усвојување на Резолуцијата гласаа 143 земји, изјави американскиот претседател Џо Бајден, пренесува Агенција Анадолија (АА).

„Речиси осум месеци по војната, светот штотуку покажа дека е пообединет и порешителен од кога и да е да бара одговорност од Русија за нејзините прекршувања. Заедно со Генералното собрание на ОН, нема да толерираме нелегални обиди за анексија или насилна кражба на соседно земјиште“, рече Бајден.

Како што рече, влогот во овој конфликт е јасен на сите, а како одговор светот испрати јасна порака: „Русија не може да избрише суверена држава од мапата.“

„Русија не може да ги менува границите со сила. Русија не може да бара територија на друга земја како своја. Украина ги има истите права како и секоја друга суверена држава. Таа мора да биде во можност да ја избере својата иднина, а нејзиниот народ мора да може да живее мирно во нејзините меѓународно признати граници“, додаде Бајден.

Гласањето на 193-членото Генерално собрание се одржа откако светската организација во понеделникот свика итна седница на која се расправаше за „незаконските“ референдуми за руската анексија на делови од источна Украина, Доњецк, Луганск, Запорожје и Херсон.

Против Резолуцијата гласаа пет земји: Русија, Венецуела, Северна Кореја, Белорусија и Сирија, додека 33 земји беа воздржани, вклучувајќи ги Кина и Индија.

Со Резолуцијата на Генералното собрание на ОН се повикуваат сите држави и меѓународни организации да не признаваат каква било промена во статусот на четирите региони во источна Украина и се бара Русија веднаш и безусловно да ги повлече своите одлуки.