Асадовиот режим во Сирија ја отстранува опозицијата преку воено-политичкиот систем за наводен тероризам

АНКАРА (АА) - ЕТЕМ ЕМРЕ ОЗЏАН -

Режимот на Башар ал Асад во Сирија во јули 2012 година формира таканаречен „Суд за тероризам“ за да се пресмета и да ги отстрани опонентите и опозиционерите, а тој суд изрече вкупно 2.147 смртни казни и заплени имот од близу 4.000 луѓе, јавува Агенција Анадолија (AA).

Сириската мрежа за човекови права (СНХР) подготви извештај за работата и задачите на Судот на режимот на Асад, а извештајот се темели и врз исказите и сведочењата на лицата кои се судени во тој суд, членовите на нивните семејства и нивните правни застапници.

Режимот на Асад во изминатите девет и пол години уби или зароби стотици илјади цивили, а режимот ги смета сите опозиционерски и антирежимски групи за терористи.

СНХР тврди дека режимот на Асад го основал таканаречениот „Суд за тероризам“, со цел ликвидација на опозицијата.

Судот, кој е составен од воени единици, им суди во отсуство и на припадници на сириската опозиција кои живеат на територија контролирана од опозициски и антирежимски групи, како и на оние во странство.

Режимските сили неселективно апсат опозициски приврзаници и ги подложуваат на разни тортури, а дел од уапсените завршуваат на суд кој им суди за наводен тероризам.

На повеќето обвинети од тој суд во Дамаск не им е дозволен контакт со нивните семејства, ниту со правни застапници.

Во извештајот на СНХР се наведува дека обвинетите во судот во Дамаск се принудуваат со закани и тортура да ги признаат делата кои им се ставаат на товар и главно добиваат тешки казни.

Судот во изминатите осум години водел вкупно 90.560 случаи, а смртни казни се изречени за 2.147 осуденици, меѓу кои на повеќето им е судено во отсуство.

Паралелно со изрекувањето на смртна казна и повеќегодишни затворски казни, режимот на Асад со посредство на судот го запленува имотот на политичката и воената опозиција.

Од СНХР тврдат дека судот запленил имот на најмалку 3.970 лица.

Судот во Дамаск е исто така и гнездо на корупција на судиите и шефовите на безбедносните единици.

Директорот на СНХР, Фадил Абдулгани, за АА изјави дека станува збор за воено-политички суд на режимот на Асад.

„Основачкиот акт и сите пресуди на тој суд се спротивни на меѓународното хуманитарно право. Сите негови пресуди се ништовни и незаконски“, рече Абдулгани.

Според извори од опозицијата, во затворите на режимот на Асад во Сирија моментално се наоѓаат близу половина милион затвореници.