Mücahit Oktay
05 Август 2021•Ажурирај: 06 Август 2021
ЊУЈОРК
Американскиот Сенат не го одобри Нацрт-законот поднесен од републиканскиот сенатор Рон Џонсон со кој се бара да се поништи одлуката за запирање на проектот за изградба на ѕид на границата со Мексико, известува Агенција Анадолија (АА).
Предлогот на републиканскиот сенатор Џонсон да се поништи откажувањето на изградбата на ѕидот на границата со Мексико не беше прифатен од американскиот Сенат, откако претседателот Џо Бајден го откажа федералното финансирање на заштитниот ѕид, чија изградба беше иницирана од неговиот претходник Доналд Трамп.
Во рамките на буџетот за инфраструктура на САД, тежок близу 1 трилион американски долари, кој се очекува да биде одобрен од Сенатот, републиканскиот сенатор Џонсон се обиде да го вметне својот нацрт-закон, но предлогот не успеа да ги достигне потребните 60 гласа за одобрување бидејќи беше поддржан само од Џо Манчин, демократскиот сенатор од Западна Вирџинија.
Во врска со Нацрт-законот, Џонсон изјави: „Треба да го завршиме ѕидот долг 285 милји (околу 458.7 километри) што ќе помогне да се обезбеди сигурноста на нашите граници, нашата татковина и Американците.“
- Трамп одлучи да изгради челичен ѕид
Поранешниот претседател на САД, Трамп, нареди изградба на челичен ѕид што опфаќа делови од американските сојузни државни граници на Аризона, Тексас и Калифорнија, со цел да се спречи неовластен влез во Соединетите Држави преку мексиканската граница.
Трамп прогласи „национална вонредна состојба“ на 15 февруари 2019 година, наспроти големиот караван имигранти кои заминуваа од земјите на Централна Америка за да мигрираат во САД и распореди десетици илјади војници во јужните гранични региони.
Еден од првите декрети што американскиот претседател Џо Бајден ги потпиша кога ја презеде функцијата на 20 јануари беше намалување на федералните средства за ѕидот изграден на границата со Мексико.
Администрацијата на Бајден откажа уште два договори за граничниот ѕид во областа Ларедо на границата меѓу САД и Мексико кон крајот на минатиот месец, наведувајќи дека овие делови од ѕидот „не се неопходни за подобрување на животот, безбедноста и животната средина“.
