ВАШИНГТОН (АА) – Податоците од јавните веб-страници за следење летови покажаа дека два американски борбени авиона Ф/A-18 на морнарицата на САД вчера се приближиле до венецуелскиот воздушен простор, изведувајќи продолжен лет и маневри над Венецуелскиот Залив, во време кога Вашингтон го засилува притисокот врз претседателот Николас Мадуро, јавува Анадолу.

Податоците од страниците, како што е Флајтрадар24, покажаа дека борбените авиони го преминале тесниот залив и повеќе од половина час реализирале маневри над Венецуелскиот Залив, привлекувајќи значително внимание на јавноста бидејќи илјадници ја следеле нивната позиција во реално време преку интернет.

Американски функционер за одбрана ја потврди мисијата, велејќи дека Министерството за одбрана „спроведува рутински, законски операции во меѓународниот воздушен простор, вклучително и над Венецуелскиот Залив“.

„Ќе продолжиме да летаме безбедно, професионално и во согласност со меѓународното право за да ја заштитиме татковината, да ги следиме нелегалните активности и да ја поддржиме стабилноста низ цела Америка“, изјави за Анадолу функционерот, кој зборуваше под услов да остане анонимен.

Инцидентот се случи во период на значително зголемени тензии и американски воени операции насочени кон Венецуела.

Тензиите ескалираа во саботата кога американскиот претседател Доналд Трамп објави дека воздушниот простор „над и околу“ Венецуела ќе биде третиран како целосно затворен.

Од септември САД изведоа најмалку 22 напада во Карипското Море и Источен Пацифик врз чамци за кои постои сомнение дека транспортираат наркотици, при што беа убиени најмалку 87 луѓе.

Минатата недела Трамп повторно предупреди дека наскоро ќе започне да ги таргетира венецуелските мрежи за трговија со дрога „и по копнен пат“.

Администрацијата на Трамп тврди дека акциите се дел од пошироките напори за борба против трговијата со дрога во регионот, додека Владата на Мадуро обвинува дека Вашингтон се обидува да „си ги присвои огромните венецуелски нафтени резерви преку употреба на воена сила“, велејќи дека борбата против дрогата служи само како вовед во обид за насилно соборување на Мадуро.