Гаши ја продолжува посетата на САД, фокус на „регионалната интеграција и трансатлантското партнерство“

СКОПЈЕ (АА) - Во рамките на посетата на Вашингтон, претседателот на Собранието, Африм Гаши учествуваше на панел-дискусија посветена на регионалната економска интеграција во Југоисточна Европа, организирана од Атлантскиот совет, пренесува Анадолу.

Според соопштението од Собранието, на дискусијата беа потенцирани зрелоста и улогата на Република Северна Македонија како фактор на стабилност во регионот, значењето на инфраструктурните проекти, како и потребата од продлабочена регионална интеграција и соработка меѓу земјите од Западен Балкан, како предуслов за одржлив развој и напредок кон Европската Унија.

„Благодарност до Атлантскиот совет за организацијата на оваа значајна платформа за дијалог“, изјавил Гаши.

Исто така, претседателот Гаши оствари средба со Макс Приморац, виш истражувачки соработник во Центарот за слобода „Маргарет Тачер“ при фондацијата „Херитиџ“.

Како што се соопштува, на оваа средба беше остварена плодна и содржајна дискусија за улогата на силните институции, вредностите на слободата и значењето на трансатлантското партнерство за мирот и стабилноста на Западен Балкан.

„Отворениот и конструктивен дијалог со нашите американски партнери е од суштинско значење за унапредување на демократските вредности и јакнење на регионалната стабилност“, истакнал претседателот Гаши.