Азербејџанскиот претседател Алијев: „Меѓународната заедница не сака да ги види постапките на режимот на Пашинјан“

БАКУ (АА) - Претседателот на Азербејџан, Илхам Алијев, изјави дека меѓународната заедница не сака да ги види постапките на ерменскиот премиер Никол Пашинјан, пренесува Агенција Анадолија (АА).

Алијев го прими Билал Хаје, амбасадорот на Пакистан во Баку, кој ја започна својата функција во земјата, предавајќи му ги акредитивните писма на Алијев.

Во своето обраќање, Алијев рече дека тие секогаш го поддржувале Пакистан во прашањето за Кашмир.

Потсетувајќи дека Пакистан не ја признава Ерменија како земја, Алијев рече: „Оваа меѓусебна поддршка ја одразува братската природа на нашата соработка. Му се заблагодаруваме на Пакистан за неговиот одлучен став за територијалниот интегритет на нашата земја.“

Азербејџанскиот претседател нагласи дека во нападите на Ерменија врз Азербејџан, кои почнаа на 27 септември, убиени се 10 азербејџански цивили, а над 20 цивили се повредени.

„Ние се бориме на своја земја. Нагорно Карабах е составен дел на Азербејџан. Меѓународната заедница го признава територијалниот интегритет на нашата земја“, рече Алијев и додаде дека азербејџанската Армија продолжува успешно со операциите во Нагорно Карабах.

Наведувајќи дека ерменскиот премиер, Никол Пашинјан, претставува закана за мирот и безбедноста во регионот, Алијев рече: „За жал, меѓународните организации не сакаат да ги видат постапките на режимот на Пашинјан. Диктатурата стана официјална политика во Ерменија. Ако меѓународната заедница не може да запре еден глупав диктатор, тоа ќе го направи Азербејџан. Азербејџан ќе му го покаже неговото место и ќе го врати територијалниот интегритет.“