Zehra Ulucak
02 Февруари 2020•Ажурирај: 03 Февруари 2020
АНКАРА (АА) - Пожарот на Територијата на главниот град (ACT) во Австралија се прошири на земјиште со површина од 55.000 хектари, пренесува Агенција Анадолија (АА).
Властите на Австралија прогласија вонредна состојба на тоа подрачје поради пожарите кои веќе неколку месеци беснеат во земјата предизвикувајќи катастрофа од големи размери.
Автономниот Регион, кој го сочинуваат главниот австралиски град Канбера и неговата периферија, се соочува со една од најголемите закани од пожари, поради што властите пред неколку дена прогласија вонредна состојба и ги повикаа жителите да бидат подготвени за можна евакуација.
Меѓутоа, локалните медиуми предупредуваат дека веќе е доцна граѓаните на одредени подрачја да ги напуштат своите домови.
Пожарот на подрачјето на Канбера сè уште не е ставен под контрола. Според пишувањето на „Канбера тајмс“ (Canberra Times), на подрачјето на долината Орорак изгореле 55.234 хектари земјиште.
Премиерот на Територијата на главниот град, Ендрју Бар, изјави дека пожарот е активен и ова утро.
„Пред нас се денови, а можеби и недели борба со огнената стихија“, рече Бар.
Големите пожари во Австралија започнаа во септември 2019 година, и во нив животот го загубија најмалку 33 лица. Опожарени се над 11 милиони хектари земјиште, а најтешко е погодена австралиската држава Нов Јужен Велс.
