Riyaz Khaliq Khaliq
14 Ноември 2024•Ажурирај: 15 Ноември 2024
ИСТАНБУЛ (АА) - Австралија и Индонезија одржуваат заедничка воена вежба, прва откако двете земји потпишаа нов одбранбен договор во август, јавува Анадолу.
Околу 2.000 војници од двете армии учествуваат во вежбата „Керис Вумера 2024“ (KW24).
Војниците ја започнаа втората фаза во Индонезија, на главниот остров Јава на југоисточната азиска држава.
Во вежбата се предвидени воздушни, поморски, амфибиски и копнени операции, како и сценарио за хуманитарна помош и евакуација при катастрофи, се вели во соопштението на австралиското Министерство за одбрана.
Во него се вели дека KW24 „ја нагласува тековната соработка меѓу двете земји, која беше зајакната со неодамнешното потпишување на Договорот за одбранбена соработка Австралија-Индонезија“.
Во соопштението се вели дека почетната фаза од обуката за интеграција се одржала во базата Робертсон Баракс во Северната Територија на Австралија.
Официјалниот претставник на индонезиските национални вооружени сили (ТНИ), потполковник Емпри Ајрудин, рече дека KW24 има цел „да ги зголеми разбирањето и способностите на ТНИ во работата со австралиските одбранбени сили, како и интероперабилноста меѓу двете земји“.
„Тоа може да се смета и како начин за одржување на безбедноста и стабилноста во регионот“, Министерството го цитираше Ајрудин.
Предвидено е вежбите да кулминираат со комбинирана заедничка вежба со жив оган во која ќе учествуваат тенкови, артилерија, пешадија и јуришни хеликоптери во текот на претстојниот викенд.
На 29 август Австралија и Индонезија потпишаа Договор за одбранбена соработка, кој ќе овозможи подобра практична соработка и интероперабилност меѓу одбранбените сили во области, како што се поморската безбедност, борбата против тероризмот, хуманитарната помош и помош при катастрофи, логистичката поддршка, образованието и обуката.
