Авганистан го произведе својот прв мотор за железницата од домашно производство

ИСЛАМАБАД (АА) - Авганистанската привремена администрација денес објави дека земјата го произвела својот прв железнички мотор од домашно производство и дека наскоро ќе управува со сопствените возови, јавува Анадолу.

Главниот портпарол на авганистанските талибанци, Забихула Муџахид, на Х објави видео од моторот за железницата кој влече три вагона и истакна дека нивната Национална компанија за развој го произвела својот прв воз.

„Националната корпорација за развој на земјата за првпат произведе воз. Со тековната изградба на железнички пруги, Авганистан наскоро ќе управува и со свои возови од домашно производство“, рече тој.

Според авганистанските државни медиуми, високи претставници на Авганистан и Казахстан оствариле средба во Кабул вчера и разговарале за соработката во железничкиот сектор.

Авганистанското Министерство за железници соопшти дека Каират Турбаев, заменик-министерот за трговија на Казахстан, ги претставил проектите што моментално ги спроведуваат казахстанските компании во Авганистан и го изразил интересот на Казахстан за транспорт на комерцијални и земјоделски стоки преку Авганистан, објави „Бахтар њуз“.

Казахстанскиот заменик-министер, исто така, ја пренел подготвеноста на неговата земја да инвестира во железничката инфраструктура на Авганистан.

Талибанците се вратија на власт во Кабул во август 2021 година, по повлекувањето на силите предводени од САД по дводецениската војна.