„Четири деца умираат секој час во израелските напади на Газа“, објави палестинско Централно биро за статистика

РАМАЛА (АА) - Во израелските напади врз Појасот Газа секој час во просек се убивани по четири деца, јавува Анадолу.

Пред „5 април - Денот на палестинските деца“ палестинското Централно биро за статистика, поврзано со палестинската администрација, објави извештај за децата во Газа.

Според извештајот, од 7 октомври минатата година во Појасот Газа се убиени 14.350 деца.

Тие наведоа дека децата сочинуваат 44 отсто од загинатите во израелските напади врз Газа.

Врз основа на овие податоци може да се заклучи дека Израел убива во просек по четири деца на секој час во Појасот Газа.

Во Појасот Газа 7.000 жени и деца се заробени под урнатините и сѐ уште се водат како исчезнати. Тоа одговара на 70 отсто од вкупниот број жртви во Газа.

Израелските сили од 7 октомври продолжуваат со рациите и убивањето на Палестинците и на Западниот Брег, при што се убиени повеќе од 455 Палестинци, од кои 117 деца, а ранети се 4.700 Палестинци, од кои 724 деца.

Покрај тоа, 1.620 Палестинци, од кои 710 деца, насилно се раселени на Западниот Брег од почетокот на 2023 година. Од 7 октомври досега се приведени 1.085 малолетници, од кои 500 се притворени.

Според податоците на Фондот на Обединетите нации за деца (УНИЦЕФ), речиси 17.000 деца изгубиле еден или двајца родители во Газа од 7 октомври.

Палестинското Министерство за здравство во Газа објави дека од 7 октомври досега во израелските напади врз Појасот Газа загинале 33.037 Палестинци, а 75.668 се повредени.