„Фајзер“ и „Модерна“ од продажбата на вакцините наредната година би требало да заработат над 32 милијарди долари

АНКАРА (АА) - Водечките три фармацевтски компании од продажбата на вакцината против Ковид-19 наредната година би требало да заработат 32,2 милијарди долари, пренесува Агенција Анадолија (АА).

Мултинационалната компанија за финансиски услуги „Морган Стенли“ објави извештај за очекуваните приходи на водечките фармацевтски компании од продажбата на вакцините против коронавирусот.

Американската компанија „Фајзер“, според тој извештај, наредната година би требало да инкасира 19 милијарди долари. Тие средства ќе ги подели со својот германски партнер „БајоНтек“.

„Фајзер“ до крајот на оваа година би требало да инкасира 975 милиони долари, а во 2022 и 2023 година продажбата на вакцината ќе продолжи и компанијата за две години би требало да заработи додатни 9,3 милијарди долари.

Компанијата „Модерна“, уште еден претставник на американската фармацевтска индустрија, која разви и произведе сопствена вакцина против Ковид-19, наредната година од продажбата на вакцината би требало да заработи 13,2 милијарди долари.

Во текот на наредните две години, „Модерна“ од продажбата на вакцината би требало да инкасира додатни десет до 15 милијарди долари.