МОСКВА (АА) - Украина ја нападна руската енергетска инфраструктура. Киев тврди дека нападите врз руската клучна инфраструктура ги поткопуваат воените напори на Москва, јавува Анадолу.

По нападот со беспилотно летало, избувна пожар во енергетските постројки во областа Смоленск, а луѓето беа евакуирани од делови на Липецк во југозападна Русија.

Пожар избувна во енергетските капацитети во областа Смоленск по напад со беспилотно летало, а делови од Липецк во југозападна Русија беа евакуирани откако беспилотно летало се урна во индустриски парк, соопштија регионалните власти.

„Нашиот регион повторно е цел на напади со украински беспилотни летала“, изјави Василиј Анохин, гувернер на регионот Смоленск во западна Русија, преку социјалната мрежа Телеграм.

„Пожарите избувнаа во областите Смоленск и Јарцево како резултат на непријателски напади врз цивилни објекти за снабдување со гориво и енергија“, напиша Анохин.

Не е познато кои згради се зафатени од оган.

Во Смоленск нема големи рафинерии за нафта.

Игор Артамонов, гувернер на областа Липецк во југозападна Русија, изјави дека беспилотното летало се урнало во тамошната индустриска зона.

Тој на Телеграм објави дека нема повредени, но околните жители се евакуирани како мерка на претпазливост. Тој не кажа дали има штета и која зграда била цел.

Украина сѐ уште не го коментираше нападот. Киев ретко коментира за напади во Русија, но украинските власти рекоа дека нападите врз клучната руска енергетска, воена и транспортна инфраструктура се легитимни и ги поткопуваат севкупните воени напори на Москва.