ВАШИНГТОН (АА) - Членовите на Советот за безбедност на Обединетите нации (СБОН) денес го осудија нападот на паравоените Сили за брза поддршка (РСФ) врз Ел-Фашер во Северен Дарфур, Судан, а изразија и „сериозна загриженост“ поради ескалацијата на насилството, пренесува Анадолу.

Членовите на Советот за безбедност во соопштението „ги осудија злосторствата извршени од Силите за брза поддршка (РСФ) врз цивилното население, вклучително и егзекуции и произволни притворања, а изразија и сериозна загриженост поради зголемениот ризик од злосторства од големи размери, вклучително и етнички мотивирани злосторства“.

Повикувајќи се на Резолуцијата 2736 (2024), која бара Силите за брза поддршка (РСФ) да ја укинат опсадата на Ел-Фашер и повикува на итно запирање на борбите и за деескалација во и околу Ел-Фашер, членовите „силно“ ги повикаа Силите да ги спроведат одредбите од оваа резолуција.