„Секој човек во Газа го чека моментот кога ќе биде убиен“

ЊУЈОРК (АА)

- Шерифе ЧЕТИН

„Секој човек што ќе се засолни во градот Рафа живее со помислата кога ќе дојде на ред да умре, односно го чека моментот кога ќе биде убиен“, изјави палестинската министерка за женски прашања Амал Хамад, јавува Анадолу.

Палестинската министерка зборуваше за Анадолу во зградата на Обединетите нации (ОН) во Њујорк.

Таа зборуваше за нападите на Израел, кој е обвинет за геноцид, за очекувањата на палестинскиот народ од меѓународната заедница и општата ситуација во Појасот Газа.

Таа истакна дека ситуацијата во Појасот Газа е катастрофа без преседан.

„Досега имаме повеќе од 110.000 повредени и убиени луѓе во Појасот Газа, од кои 73 отсто се жени и деца“, нагласи Хамад.

Потсети дека од 7 октомври минатата година досега се убиени 14.000 деца и 9.000 жени.

Таа истакна дека жените во Газа моментално живеат во шатори без вода, струја и храна и дека нема образование, здравствени услуги и можност за заштита на нивните семејства.

Хамад изјави дека како последица на израелските напади врз Појасот Газа загинале цели семејства.

„Како последица на израелските бомбардирања, убиени се дете, мајка, брачен другар или цело семејство. Палестинските жени се најповредени и најпогодени од овие напади и доживуваат психичко уништување“, рече палестинската министерка.

Таа истакна дека Палестинките се соочуваат со сиромаштија, невработеност и недостаток на основни услови за живот.

„Палестинките во сегашните услови во Појасот Газа го чекаат својот ред да умрат“, нагласи Хамад.

Привлекувајќи внимание на сериозноста на ситуацијата во градот Рафа, кој се наоѓа на југот на Појасот Газа, во близина на египетската граница, Хамад рече дека областа на градот зафаќа 20 отсто од енклавата. Таа потсети дека моментално 60 до 70 отсто од жителите на Појасот Газа нашле засолниште во Рафа.

„Густината на населението во областа Рафа е над нормалата. Луѓето таму живеат во шатори, нема вода, нема храна, а условите за живот се многу лоши. Луѓето во Рафа се во невиден страв и вознемиреност. Секој човек што се засолнува во градот живее со мислата кога ќе му дојде редот да умре, односно го чекаат моментот кога ќе бидат убиени“, предупреди Хамад.

Што се однесува до очекувањата на палестинскиот народ од меѓународната заедница, Хамад изјави:

„Сакаме меѓународната заедница да ја исполни својата одговорност да го спаси секој Палестинец во Газа, а особено во градот Рафа. Густината на населението во градот Рафа не постои на друго место на Земјата.“

Таа се осврна и на апелот и ги повикува сите земји и ОН да извршат притисок врз окупаторот Израел да ги запре нападите во Појасот Газа и да обезбеди прекин на огнот.

„Во Газа нѐ убиваат со оружје што го извезуваат многу земји. Затоа, сакаме луѓето да извршат притисок врз владите на овие земји. Секоја земја што доставува оружје за Израел е одговорна за убиствата на палестинските цивили, деца и жени“, рече Хамад.