Sanja Kerazovska
12 Февруари 2026•Ажурирај: 18 Февруари 2026
ГАЗА (АА) – Секој ден претставува борба за баба од Газа, која чува 17 внуци под нејзина закрила, во скоро уништен објект, соочена со недостаток на основни потреби, како и храна и гориво, пишува Анадолу.
Мона Хасан (50), која ги загубила сопругот и синот во израелските напади врз Појасот Газа, живее во областа на Жолтата линија во населбата Зејтун, во зграда која нема цели ѕидови и кров.
„Живееме во опасност. Бидејќи живеам блиску до линијата, во близина на Евреите, целиот наш живот е во опасност. Во секој момент може да ни се случи нешто“, изјави Хасан за Анадолу на 8 февруари.
Таа опиша дека собира огревно дрво и отпадни материјали, вклучително и обвивки од бонбони и ќеси од чипс, за да запали оган за готвење поради сериозниот недостиг на гас.
„За да им обезбедам храна на моите деца и на најмалите што ги имам, мора да готвам. Принудени сме, ако сакаме да јадеме - мора да се бориме. Тоа е многу, многу исцрпувачко“, рече таа.
Покрај физичките тешкотии, Хасан изјави дека постојаните истрели на огнено оружје, експлозии и движењето на тенковите во текот на ноќта создаваат уште поголем психолошки притисок.
„Ноќе често не можеме да спиеме. Не можеме повторно да се раселуваме - немаме енергија, немаме сила, немаме здравје“, рече таа, додавајќи дека зградата во која се наоѓаат е во опасност од уривање.
И покрај прекинот на огнот што стапи во сила на 10 октомври минатата година, кој требаше да вклучува и повторно отворање на граничните премини, Хасан вели дека условите не се подобрени.
„Тие велат дека преминот е отворен, но досега не забележавме никакви промени. Напротив — кога првпат дојдовме од југ, не слушавме огнено оружје или куршуми. Сега квадрокоптерите се на улиците, а ноќе постојано се пука“, рече таа.
Хасан чувствува очај бидејќи да замине некаде со 17-18 деца под нејзина грижа, покрај недостиг на транспорт и ресурси, е практично невозможно.
„Најосновното право на човекот е достоинствен живот. А ние само посакуваме достоинствен живот“, рече таа. „Копнееме по таков живот - каде што нема да легнуваме гладни, каде што нема да спиеме иплашени.“
Израел веќе скоро 18 години одржува блокада на Газа, дом на речиси 2,4 милиони Палестинци. Опсадата се засили кога граничните премини беа затворени и доставувањата на храна и лекови беа блокирани, присилно носејќи ја енклавата кон општа глад.
Израел целосно ја затвори палестинската страна на преминот Рафа од мај 2024 година како дел од својата офанзива врз Појасот Газа, која од октомври 2023 година однесе повеќе од 71.600 животи, претежно на жени и деца.
Според Министерството за здравство во Газа, и покрај прекинот на огнот, израелската Армија продолжува со прекршувања, при што се убиени 581 Палестинец, а 1.553 се ранети.
