Речиси два милиона луѓе во Израел живеат под прагот на сиромаштијата

ЕРУСАЛИМ (АА) – Речиси два милиона луѓе во Израел живеат под прагот на сиромаштија, меѓу кои околу 880.000 деца, покажуваат официјалните податоци објавени денес, кои укажуваат на продлабочување на социјалната криза во услови на војна, раст на трошоците за живот и забавен економски раст, јавува Анадолу.

Податоците се објавени во Извештајот за сиромаштија за 2024 година на Националниот институт за осигурување, во кој се наведува дека населението на земјата надминува 10 милиони, при што Палестинците сочинуваат околу 21 отсто.

„Во Израел има приближно два милиона сиромашни луѓе, меѓу кои околу 880.000 деца, што значи дека повеќе од едно од четири деца живеат во сиромаштија“, се наведува во извештајот.

Сиромаштијата кај децата се проценува на 28 отсто, што е зголемување од 27,6 отсто во 2023 година, додека речиси еден милион деца се соочуваат со недостиг од храна поради економските тешкотии, се додава во Извештајот.

Институтот предупреди дека економските услови за децата продолжуваат да се влошуваат како резултат на влијанието на војната, постојано високите трошоци за живот и бавниот економски раст.

Според Извештајот, прагот на сиромаштија за поединец во Израел изнесува 3.547 шекели месечно, во согласност со индикаторите на Организацијата за економска соработка и развој (ОЕЦД). За двочлено семејство, прагот изнесува 7.095 шекели, додека петчлено семејство се смета за сиромашно доколку неговите приходи се под 13.303 шекели месечно.

Општата стапка на сиромаштија покажува мала промена во однос на 2023 година, со благ пораст кај поединците од 20,6 на 20,7 отсто, додека кај семејствата бележи мало намалување од 20,2 на 20 отсто.

Кај постарите лица, во сиромаштија живеат околу 158.000 луѓе, што е ниво повисоко од просекот на ОЕЦД.

Израел се наоѓа на второ место меѓу земјите на ОЕЦД по стапката на сиромаштија кај децата, веднаш по Костарика.

Во Извештајот ова се поврзува со ниските јавни трошоци за социјална заштита, кои изнесуваат 16,7 отсто од бруто-домашниот производ, значително под просекот на ОЕЦД.

Највисоки стапки на сиромаштија се забележани кај палестинските и ултраортодоксните (харедиски) еврејски заедници. Според податоците, 37,6 отсто од палестинските семејства и 32,8 отсто од харедиските семејства живеат под прагот на сиромаштија, при што заедно сочинуваат 65,1 отсто од сиромашното население во Израел.

Извештајот доаѓа во период кога Израел е вклучен во продолжени регионални конфликти, вклучително и тековната војна во Газа и воени операции на повеќе фронтови, што дополнително ја оптоварува економијата и социјалната структура на земјата.