Beyza Binnur Dönmez
24 Мај 2022•Ажурирај: 25 Мај 2022
АНКАРА (АА) - Шпанскиот премиер Педро Санчез рече дека е важно рускиот претседател Владимир Путин да биде изолиран од меѓународната заедница поради војната што ја започна против Украина и нејзините глобални ефекти, јавува Агенција Анадолија (АА).
„Важно е да се изолира Путин од меѓународната заедница, и ова е нешто што го правиме... Мислам дека е многу важно да се има на ум дека ова е глобален предизвик“, изјави Санчез на Светскиот економски форум во Давос.
Санчез, исто така, ја нагласи потребата од „отворена стратешка автономија“ на ЕУ за создавање нови врски во трговијата со другите региони, како што е Латинска Америка.
- Финска и Шведска ќе се приклучат на состанокот на НАТО во Мадрид -
Во однос на состанокот на НАТО што ќе се одржи кон крајот на јуни во Мадрид, шпанскиот премиер рече дека меѓу учесниците ќе бидат и Финска и Шведска, кои неодамна аплицираа за влез во Алијансата.
„Ќе пречекаме две нови земји во НАТО и секако мислам дека е многу важно за стабилноста на Европската Унија и иднината на НАТО.“
Двете земји формално аплицираа за влез во НАТО минатата недела - одлука поттикната од руската војна против Украина, што започна на 24 февруари.
Но, Турција, долгогодишна членка на Алијансата, изрази приговори за кандидатурите за членство, критикувајќи ги земјите дека толерираат, па дури и ги поддржуваат терористичките организации.
