Пакистан рангиран како најзагадена земја во 2025 година, покажуваат податоците

КАРАЧИ (АА) – Пакистан е рангиран како најзагадена земја во светот во 2025 година, потоа следуваат Бангладеш и Таџикистан, покажуваат најновите податоци за квалитетот на воздухот објавени денес, пренесува Анадолу.

Јужноазиската земја се наоѓа на врвот на листата со концентрации на опасни ситни честички познати како ПМ 2,5, кои се 13 пати повисоки од препорачаното ниво на Светската здравствена организација (СЗО), објави швајцарската компанија за мониторинг на квалитетот на воздухот „IQAir“ во својот годишен извештај.

Според извештајот, пет најзагадени земји биле Пакистан (67,3 µg/m³), Бангладеш (66,1 µg/m³), Таџикистан (57,3 µg/m³), Чад (53,6 µg/m³) и Демократска Република Конго (50,2 µg/m³).

- Најзагадени градови -

Градот Лони, во најголемата индиска држава Утар Прадеш, бил најзагаден град во светот, каде што била регистрирана годишна просечна концентрација на ПМ 2,5 од 112,5 µg/m³, што е зголемување за речиси 23 отсто во споредба со 2024 година и над 22 пати повеќе од препораките на СЗО.

Најзагадени 25 града во светот се од Индија, Пакистан и Кина, а во Индија се три од четирите најзагадени градови.

Ел Пасо во Тексас бил најзагаден голем град во САД, а југоисточен Лос Анџелес во Калифорнија бил рангиран како најзагаден регион. Сиетл во Вашингтон бил најчист голем американски град.

- Лидери по квалитет на воздухот -

Ниувортвил во Јужноафриканска Република бил најчист град во светот, со годишна просечна концентрација на ПМ 2,5 од само 1,0 µg/m³.

Тринаесет земји и територии ги задржале нивоата на ПМ 2,5 под стандардот на СЗО од 5 µg/m³ во 2025 година, што е пораст во однос на седум регистрирани во 2024 година. Меѓу нив се Француска Полинезија, Порторико, Американски Девствени Острови, Барбадос, Нова Каледонија, Исланд, Бермуди, Реинион, Андора, Австралија, Гренада, Панама и Естонија.

Сепак, само скромни 14 отсто од градовите на глобално ниво го исполниле стандардот за квалитет на воздухот на СЗО, што е намалување од 17-те отсто во изминатата година. Околу 91 отсто од земјите и териториите (130 земји од 143) го надминале безбедното ниво.

За годинашниот извештај „IQAir“ анализирала податоци од мерни станици во 9.446 града во 143 земји, региони и територии.