Осомничениот Авганистанец за пукањето во американската Национална гарда се изјасни за невин

ХЈУСТОН (АА) – Осомничениот за пукањето во Вашингтон, при што беше убиен еден припадник на Националната гарда, вчера се изјасни за невин по обвиненијата за убиство и повеќе дела поврзани со напад и огнено оружје, објавија американските медиуми, пренесува Анадолу.

Рахманулах Лаканвал (29) се појави виртуелно пред Вишиот суд во Вашингтон од болнички кревет, при што се изјасни за невин по повеќе точки на обвинението, меѓу кои убиство од прв степен, напад со намера да убие, поседување огнено оружје и поседување оружје за време на насилство.

Според истражните органи, Лаканвал минатата недела пукал во Сарa Бекстром (20) и наредникот Ендру Волф (24), кои биле во патрола во близина на Белата куќа како дел од нивното распоредување од Националната гарда на Западна Вирџинија. Бекстром почина, а Волф и понатаму е во критична состојба.

Судијката Рене Рејмонд оцени дека доказите против осомничениот се „исклучително силни“.

„Постојат видеоснимки на кои се гледа како тој чека вооружен сред бел ден и во моментот кога забележува група припадници на органите на редот, меѓу кои и жртвата и повредениот припадник на Националната гарда, се движи кон нив и почнува да пука“, рече Рејмонд.

„Тоа повторно укажува на силата на аргументот на Владата.“

Лаканвал, авганистански државјанин што порано работел за оддел во рамките на Централната разузнавачка агенција (ЦИА), се изјасни за невин по сите точки. Тој останува во притвор без право на кауција.

Властите засега не објавија ништо за мотивите за нападот.