„Неприфатливо е она што се случува во Газа“, изјави германскиот канцелар Мерц

БЕРЛИН (АА) - Германскиот канцелар Фридрих Мерц денес продолжи со критиките кон израелската воена кампања во Газа и повика на итен прекин на огнот и поголема хуманитарна помош за Палестинците, јавува Анадолу.

Говорејќи на прес-конференција во Берлин, Мерц изрази загриженост за ситуацијата во Газа и рече дека води разговори со европските лидери за начините за постигнување прекин на огнот и обезбедување непречен пристап до хуманитарна помош.

„Акциите во Појасот Газа повеќе не се прифатливи за нас“, рече конзервативниот лидер. „Ние се залагаме, прво, за прекин на огнот таму и, второ, за сеопфатна хуманитарна помош за луѓето во регионот“, додаде тој.

Мерц истакна дека ги искажал овие загрижености за време на телефонските разговори со израелскиот премиер Бенјамин Нетанјаху и потврди дека ќе продолжи со своите дипломатски напори за решавање на ситуацијата.

„Вчера разговарав за ова со британскиот премиер Кир Стармер во Лондон. Ќе се осврнам повторно на тоа следната недела кога францускиот претседател Емануел Макрон ќе го посети Берлин“, рече канцеларот.

„Сакаме да ѝ помогнеме на земјата (Израел), но исто така јасно и недвосмислено наведуваме што е неприфатливо и она што моментално се случува таму (Газа) повеќе не е прифатливо“, додаде тој.

Откако Израел ја започна својата воена кампања во Газа во 2023 година, убиени се речиси 59.000 Палестинци, а над 100.000 други се ранети, повеќето од нив жени и деца.

Израел моментално се соочува со тужба за геноцид во МСП за своите дејствија во Газа, каде што најмалку 1,9 милиони Палестинци се раселени и страдаат од сериозен недостиг на храна, медицински материјали и други основни потреби.