„Нема повик кон НАТО за мисијата во североисточна Сирија“

АНКАРА (АА) - Генералниот секретар на НАТО, Јенс Столтенберг, изјави дека кон НАТО нема повик за преземање на мисијата во североисточна Сирија, јавува Anadolu Agency (AA).

„Нема повик НАТО да ја преземе мисијата во североисточна Сирија“, изјави Столтенберг за новинарите пред состанокот на министрите за одбрана на НАТО во Брисел, каде што беше запрашан дали НАТО размислува за преземање на улогата за создавање безбедна зона во северна Сирија.

„Силно верувам дека она што ни треба е обид за поддршка на политички процес, трајно политичко решение, и затоа, исто така, НАТО силно ги поддржува напорите предводени од ОН за изнаоѓање политичко решение за кризата во Сирија“, додаде Столтенберг.

Тој рече дека министрите за одбрана ќе разговараат за предлогот на германската министерка за одбрана, Анегрет Крамп-Каренбауер, за „меѓународно контролирана безбедносна зона“ во северна Сирија за стабилизирање на регионот.

„Мислам дека е позитивно што сојузниците на НАТО, и во овој случај Германија, имаат предлози, имаат идеи за тоа како можеме да одиме напред и како можеме да создадеме услови за трајно и политичко решение“, додаде тој.