„Не е несреќна грешка“, смета основачот на СЦК за гранатирањето на хуманитарниот конвој од страна на Израел

АНКАРА (АА)

Шпанскиот готвач Хозе Андрес, основач на меѓународната хуманитарна организација Светска централна кујна (СЦК), чии 7 вработени загинаа во нападот на израелската Армија, изјави дека гранатираниот конвој на СЦК се движел во координација со израелската Армија и истакна дека гранатирањето на конвојот бил „директен напад“, а не „несреќна грешка“, известува Анадолу.

Андрес, кој во солзи даде интервју за израелската телевизија Канал 12, зборуваше за израелскиот воздушен напад во кој се убиени 7 вработени на Светската централна кујна.

Посочувајќи дека воздушниот напад врз конвојот на СЦК не е „несреќна грешка“, Андрес рече:

„Не мислам дека воздушните напади врз нашиот конвој беа несреќна грешка. Ова всушност беше директен напад врз јасно обележани возила, чии движења им беа познати на сите во израелската Армија.“

Андрес посочи дека конвојот бил гранатиран на подрачје од Појасот Газа кое е под контрола на израелската Армија и каде што не е можно никој да влезе без да биде подложен на долги пребарувања од страна на Армијата.

Не можејќи да ги задржи солзите додека зборуваше за вработените во СЦК кои ги загубија животите во израелските напади, Андрес рече дека претходно бил во Газа и додаде дека некои од убиените хуманитарни работници на СЦК биле и негови пријатели.

„Зоми (Франком) беше една од најпријатните луѓе што некогаш сте можеле да ги сретнете. Беше како ангел. Таа беше жена со љубезно срце која ги хранеше луѓето во неволја низ светот“, рече Андрес.

- „Да го браниш својот народ не значи да ги убиеш сите наоколу“

Велејќи дека верува во правото на Израел да се брани, Андрес истакна:

„Сепак, бранењето на својот народ не значи убивање на сите наоколу.“

Потенцирајќи дека е од суштинско значење Израел да дозволи влез на лекови и помош во храна во Појасот Газа и притоа да отвори повеќе копнени патишта, Андрес рече дека на вчерашната средба со американскиот претседател Џо Бајден зборувал на оваа тема.

„Да бидеме сигурни дека ќе запре континуираното убивање на сè што се движи во Газа“, побара Андрес.

- Убиството на вработените на СЦК

Во нападот на Израел врз регионот Деир ал Балах во Појасот Газа на 1 април, убиени се вработени на меѓународната хуманитарна организација Светска централна кујна.

Во соопштението на хуманитарната организација СЦК, со седиште во Вашингтон, се вели дека 7 нејзини вработени загинале во израелскиот напад во Газа.

Во соопштението се наведува дека вработените кои ги загубиле животите се државјани на Австралија, Полска, Обединетото Кралство, американско-канадски и палестински државјани. За време на нападот хуманитарните работници на СЦК се наоѓале во зоната на деескалација, во две блиндирани возила со логото на организацијата.

„Ова е трагедија. Работниците на хуманитарната помош и цивилите никогаш, никогаш не треба да бидат цел на напади“, се вели во соопштението.

Израелската Армија од своја страна објави: „Армијата спроведува сеопфатна истрага на највисоко ниво за да ги разбере околностите на овој трагичен инцидент.“

Премиерот Бенјамин Нетанјаху, во видеопораката што ја објави на својот профил на социјалната мрежа, за нападот на израелската Армија врз меѓународниот конвој со помош во Појасот Газа во кој се убиени 7 хуманитарни работници, од кои повеќето се западни државјани, рече:

„Такви инциденти се случуваат во војните. Ова ќе го истражиме до крај. Во комуникација сме со релевантните влади. Ќе сториме сѐ да не се повтори ова.“