„Нациите сè уште заразени со исламофобија не можат да протестираат за потегот во врска со Аја Софија“

КУАЛА ЛУМПУР (АА) - Западните земји кои сè уште заразени со исламофобијата немаат простор да протестираат против потегот на Турција за враќање на Аја Софија во нејзиниот историски статус како џамија, порача денес истакнат малезиски политичар, јавува Агенција Анадолија (АА).

„Овие земји молчеа додека Израел планираше да ја разурне џамијата Ал-Акса во Ерусалим. Сега, тие протестираат за Аја Софија“, рече Абдул Хади Аванг, специјален претставник на Малезија за Блискиот Исток и лидер на Малезиската исламска партија (PAS).

Палестинците веќе долго време предупредуваат дека израелските работи на ископување околу тој простор упатуваат на нивните планови за уривање на џамијата и повторно градење на Третиот храм таму.

Во писмената изјава, Хади вели дека по освојувањето на Истанбул, Аја Софија служела како главна градска џамија речиси 500 години.

Абдул Хади истакнува дека и другите истакнати истанбулски џамии како Сината џамија, Шехзаде, Сулејмание и џамијата Рустем паша биле инспирирани од Аја Софија.

На 10 јули, Врховниот суд на Турција го поништи декретот на Кабинетот од 1934 година, со кој Аја Софија беше претворена во музеј, со што го врати нејзиниот статус како џамија по 85-годишен прекин.

Архитектонското чудо во срцето на Истанбул беше црква во Византиската ера, но беше претворена во џамија во 1453 година, по османлиското освојување на градот.