Dilara Karataş
16 Октомври 2025•Ажурирај: 17 Октомври 2025
АНКАРА (АА) - Венецуелскиот претседател Николас Мадуро изјави „не за државните удари поддржани од ЦИА“ како одговор на овластувањето што американскиот претседател Доналд Трамп ѝ го даде на Централната разузнавачка агенција (ЦИА) да спроведува операции на венецуелска територија под изговор „борба против дрогата“, известува Анадолу.
Според државниот телевизиски канал ВТВ, Мадуро за време на еден настан реагирал на изјавите на Трамп.
Потсетувајќи се на минатите воени операции на САД во Авганистан, Ирак и Либија, Мадуро изјавил дека тој вид политики завршуваат со неуспех.
Мадуро рече: „Не за промени на режимот. Не за државните удари поддржани од ЦИА што нè потсетуваат на 30.000 луѓе што исчезнаа во рацете на оваа организација, на државните удари во Аргентина, државниот удар на (Аугусто) Пиноче во Чиле при што беа убиени или исчезнаа 5.000 луѓе.“
На 14 октомври американскиот претседател Трамп објави дека брод за кој се тврди дека бил вклучен во шверц на дрога бил нападнат покрај брегот на Венецуела, при што загинале шест лица.
Трамп потврди дека ја овластил ЦИА да спроведува операции на венецуелска територија под изговор „борба против дрогата“.
- Активности на Кариби
Американскиот претседател Трамп претходно потпиша декрет со кој се наредува зголемена и поефикасна употреба на армијата за борба против наркокартелите со потекло од Латинска Америка.
Во овој контекст, кон крајот на август САД пратија поморски сили составени од подморница и воени бродови покрај брегот на Венецуела, а американскиот министер за одбрана Пит Хегсет изјави дека американската војска е подготвена за операции во Венецуела, вклучително и промена на режимот.
Како одговор на тоа, венецуелскиот претседател Николас Мадуро објави дека мобилизирал 4,5 милиони претставници на милицијата во земјата и подготвен е да одбие каков било напад.
Континуираното таргетирање на одредени бродови покрај брегот на Венецуела од страна на САД поради „шверц на дрога“ предизвика критики и од венецуелската Влада и од меѓународната заедница, при што некои тврдат дека нападите го „прекршуваат меѓународното право“.
