Alaattin Doğru
17 Февруари 2022•Ажурирај: 18 Февруари 2022
АНКАРА
Францускиот весник „Ле журнал ди диманш“ (Le Journal de Dimanche) пишуваше за муслиманите кои бегаат од Франција поради исламофобијата, пренесува Агенција Анадолија (АА).
Во веста објавена во „Ле журнал ди диманш“ со наслов „Млади француски муслимани кои се засолнија во земјата на Ердоган“ се наведува дека Турција веќе долги години привлекува стотици муслимани кои живеат во Франција.
Меѓу нив има гоелм број познати личности, воглавно со северноафриканско потекло, меѓу кои и влијателни Французи кои подоцна преминале во ислам. Во последните пет години тие ја избраа земјата на претседателот Реџеп Таип Ердоган како земја во која емигрираа.
Во веста се нагласува дека тие феномени се генерално религиозни, глобализирани и продуктивни претприемачки профили и ги користат кодовите на западната модерност и капитализам.
Нагласувајќи дека Турција не е случајно избрана земја за овие западни муслимани, во веста се посочува дека многу млади луѓе од северноафриканско потекло се населиле во земјите од Заливот, но дека „економски развиената, западна и муслиманска Турција е сѐ попопуларна миграциска дестинација за квалификувани луѓе од оваа категорија“.
‒ Тие ја чувствуваат Турција поблиску до нивниот начин на живот
Во веста е даден простор за приказната за 32-годишниот Тибо, кој бил пекар во градот Исер, Франција, и се населил во Истанбул со сопругата и двете деца пред година и пол. Тибо решил да ја напушти Франција по дебатите за исламот во земјата. Тие најпрвин заминале во Босна и Херцеговина, потоа во Норвешка, а на крајот се населиле во Турција.
Се нагласува дека парот прво за трајна миграција ги оценил земјите Египет и Мароко, но ја претпочитал Турција, која ја чувствувал поблиску до нивниот животен стил.
Јутјуб-феноменот Фосил Махани, кој се населил во Анталија во 2019 година, за Турција рече: „Овде има двојна култура, европска и блискоисточна. Тоа ме привлекува.“
Исто така, во веста се наведува дека Давид Бизе, кој дошол од францускиот град Дижон, а подоцна преминал во ислам, живее во Турција од 2019 година.
Во веста се наведува дека Фејсбук-групата „Имиграција во Турција“, основана од Бизе во октомври 2020 година, брои 2.000 члена, а пред две недели тој на својот профил напишал: „Нема недела во која не добивам пораки од Французите кои се населиле во Турција или сакаат да се населат.“
Американскиот весник „Нујорк тајмс“ (New York Times) објави извештај на оваа тема во кој може да се прочита дека многу муслимани кои биле подложени на дискриминаторски и исламофобичен третман во Франција, тивко ја напуштиле земјата бидејќи не се чувствувале безбедни.
Во специјалната вест објавена во американскиот весник „Њујорк тајмс“, насловена како „Муслиманите тивко ја напуштаат Франција“, се вели дека во време на предизборните кампањи за претстојните претседателски избори, кога главно има дебати за имиграциските прашања, бројот на муслимани што ја напуштаат Франција од ден на ден се зголемува и дека тоа укажува на длабока криза.
Според истражувачите, како што се наведува во веста, Франција изгубила висококвалификувани динамични професионалци, меѓу кои и многу Французи муслимани кои како причина за своето заминување од земјата ја навеле дискриминацијата.
„Овие луѓе постојано ја доведуваат во прашање нивната безбедност. Се чувствуваат принудени да ја напуштат земјата поради постоењето на предрасуди кон нив“, се вели во веста.
