ТЕХЕРАН (АА) – Иран не се стреми кон развој на нуклеарно оружје, изјави денес заменик-министерот за надворешни работи Саид Хатибзадех, нагласувајќи дека Техеран има цел постигнување мирен нуклеарен договор со САД, јавува Анадолу.

Говорејќи на Стратегискиот форум во Абу Даби, Хатибзадех истакна дека иранската нуклеарна програма е исклучително мирољубива и се темели врз домашните капацитети на земјата.

„Нуклеарното оружје не е дел од програмата на Иран“, рече Хатибзадех, кој наедно е и директор на Центарот за јавна дипломатија при Министерството за надворешни работи.

Високиот ирански дипломат, сепак, го обвини Вашингтон дека праќа „контрадикторни пораки преку трети страни“ во врска со нуклеарните преговори.

Хатибзадех нагласи дека евентуален договор со САД може да се постигне единствено во рамките на насоките на врховниот лидер, ајатолахот Али Хаменеи, кој постојано инсистира на дијалог заснован врз заемна почит меѓу двете страни.

Тој додаде дека Иран нема да прави компромиси кога станува збор за националната безбедност.

Неговите изјави доаѓаат во момент кога Иран и САД сè уште се наоѓаат во безизлезна ситуација околу обновувањето на индиректната нуклеарна дипломатија, која беше прекината по израелските напади на средината на јуни.

Нападите се случија само два дена пред закажаната шеста рунда индиректни преговори меѓу Техеран и Вашингтон, со посредство на Оман.

Иранските власти ги обвинија САД дека стојат зад израелските напади, кои предизвикаа 12-дневна војна меѓу двете држави-непријатели и резултираа со над 1.000 жртви во Иран, меѓу кои и високи воени команданти.

Портпаролот на иранското Министерство за надворешни работи, Есмаил Багаеи, вчера изјави дека односите меѓу Иран и САД се дефинирани преку „долгото историско искуство“, повикувајќи се на неодамнешниот говор на ајатолахот Хаменеи.

„Некои предлагаат Иран да преземе еднострани ‘храбри чекори’, игнорирајќи ги агресијата и регионалното однесување на Америка, но тоа е погрешно. САД го нападнаа Иран, се фалат со тоа, а потоа тврдат дека се подготвени за преговори“, рече Багаеи.

Иран тврди дека и натаму ги исполнува своите обврски како потписник на Договорот за неширење на нуклеарно оружје (NPT) и го брани своето збогатување на ураниум до 60 отсто.

Меѓутоа, Меѓународната агенција за атомска енергија и западните земји изразија сомневање во врска со тоа.