„Дистрибуцијата на храна во Газа е организирано убиство“, објавија 'Лекари без граници'

БРИСЕЛ (АА) – Француската хуманитарна организација „Лекари без граници“ (МСФ) денес соопшти дека дистрибуцијата на храна во Газа преку Фондацијата за хуманитарна помош во Газа (ГХФ), поддржана од Израел, претставува „организирано убивање и деградирање на човечките животи“, јавува Анадолу.

МСФ ги обвини израелските сили, дека заедно со приватни американски компании, спроведуваат насилство врз гладните Палестинци кои се обидуваат да дојдат до храна на пунктовите управувани од ГХФ.

Организацијата ја нарече ГХФ „израелско-американски прокси кој ја милитаризирал дистрибуцијата на хуманитарна помош во Газа“.

Во својот извештај насловен „Ова не е помош. Ова е организирано убивање“, МСФ се повикува на медицински податоци, сведоштва на пациенти и директни набљудувања од две клиники управувани од организацијата во близина на пунктовите на ГХФ во јужна Газа.

Од 7 јуни до 24 јули, двете клиники третирале 1.380 лица повредени во насилство поврзано со пунктовите на ГХФ, меѓу кои и 28 кои биле донесени мртви, соопшти организацијата.

Меѓу повредените имало и 71 дете со прострелни рани, од кои 25 биле помлади од 15 години. МСФ посочи дека многу семејства, поради екстремен недостиг на храна, често испраќаат адолесцентни момчиња на пунктовите за дистрибуција, бидејќи тие се единствените физички способни членови на домаќинството.

МСФ повика на итно укинување на шемата на ГХФ, враќање на хуманитарната распределба координирана од Обединетите нации и прекин на целата финансиска и политичка поддршка од страна на владите, особено на САД, и приватните донатори кон ГХФ, чии пунктови ги нарече „смртоносни замки“.

На 27 мај, Израел започна одделна иницијатива за дистрибуција на храна преку ГХФ, заобиколувајќи ги ОН и меѓународните хуманитарни организации.

Отфрлајќи ги меѓународните повици за прекин на огнот, израелската Армија уби над 60.400 Палестинци во Газа, повеќето од нив жени и деца, од октомври 2023 година. Воената кампања ја уништи енклавата, го разори здравствениот систем и доведе до смрт од глад.