ГАЗА (АА) - Најмалку осуммина Палестинци, меѓу кои и едно дете, се убиени, а неколкумина се повредени рано утринава во израелските напади врз шатори за раселени лица, куќа и група цивили во Појасот Газа и покрај договорот за прекин на огнот во енклавата, соопштија медицински извори, јавува Анадолу.

Изворите за Анадолу изјавија дека телата на осумтемина Палестинци, заедно со неколку повредени лица, пристигнале во болниците низ енклавата по бомбардирањето.

Очевидци за Анадолу изјавија дека гранатирањето било насочено кон шатори во кои се сместени раселени лица во градот Кан Јунис, во јужниот дел на Појасот Газа.

Артилериски оган, исто така, бил насочен кон куќа во населбата Ал-Туфах источно од градот Газа, како и улица во населбата Ал Зејтун, рекоа очевидци.

Прекршувањата на прекинот на огнот продолжија и покрај објавата на американската администрација во јануари дека започнала втората фаза од договорот за прекин на огнот. Таа фаза вклучува дополнително повлекување на Израел од Газа и започнување на напорите за обнова, за која Обдинетите нации (ОН) проценуваат дека ќе чини околу 70 милијарди долари.

Прекинот на огнот ја заврши израелската офанзива што започна во октомври 2023 година и траеше две години, при што се убиени повеќе од 71.000 Палестинци и повредени над 171.000 лица, а беше уништена и околу 90% од инфраструктурата на Газа.