Се воведува систем за автоматска локација на автобусите

СКОПЈЕ (АА) - Градоначалникот на Град Скопје, Коце Трајановски и директорот на Јавното сообраќајно претпријатие, Игор Jанушев, денеска го промовираа Системот за автоматска локација на возилата од јавниот градски превоз, јавува Anadolu Agency (AA).

"Со воведувањето на овој модерен систем за автоматска локација на возила и електронска наплата, Градот Скопје и неговите граѓани ќе добијат побрз и поквалитетен градски превоз. Контролниот центар ќе ги следи автобусите во реално време, дали се запазуваат пропишаните возни редови, односно за секој автобус има една линија преку која се следи неговото движење, дали има доцнење или потреба од негова замена доколку има дефект" рече Трајановски, според кој Градот Скопје и Јавното сообраќајно претпријатие Скопје на овој проект одвоиле околу 3 милиони евра.

Директорот на Јавното сообраќајно претпријатие Скопје, Игор Јанушев, потенцираше дека овој најмодерен систем ќе им овозможни точна информација на граѓаните и ќе ја оптимизира работата на ЈСП, односно ќе придонесе за подобар превоз на граѓаните.

"Системот за автоматска локација и електронска наплата треба да биде инсталиран во 500 автобуси од јавниот градски превоз, во 385 на ЈСП и во 115 автобуси на приватните превозници" истакна Јанушев.

Од Град Скопје известуваат дека преку системот ќе се врши управување на возилата во мрежата на линии, контрола на работата на возачите и спроведувањето на планираниот возен ред, можност за навремено и ефективно реагирање од организаторот на превозот во непредвидени ситуации во сообраќајот и подигнување на нивото на безбедност на возачите и патниците.