Претседателот Пендаровски се сретна со специјалниот претставник на Обединетото Кралство за Западен Балкан

СКОПЈЕ (АА) - Претседателот на Република Северна Македонија, Стево Пендаровски, денеска го прими сер Стјуарт Пич, специјален претставник на Обединетото Кралство за Западен Балкан, пренесува Агенција Анадолија (АА).

• Обединетото Кралство со силна посветеност за евроатлантската интеграција на Западен Балкан

Пендаровски изрази задоволство од посетата на специјалниот претставник Пич набрзо по неговото именување на функцијата во декември 2021 година. Посетата, како што оцени претседателот, е потврда за посветеноста на Обединетото Кралство за одржување на стабилноста и просперитетот на регионот.

„Соговорниците разменија мислења и информации за актуелните состојби во земјава и регионот, како и можностите за соработка со Обединетото Кралство за темите од заеднички интерес, поврзани со стабилноста и безбедноста, како и зајакнувањето на институциите во борбата против организираниот криминал и високата корупција“, стои во соопштението на Кабинетот на претседателот.

На средбата станало збор и за прашањата поврзани со членството на Република Северна Македонија во Европската Унија и тековниот дијалог со Република Бугарија.

Претседателот Пендаровски го информирал сер Стујарт Пич за напредокот на дијалогот помеѓу двете земји. Во тој контекст, Пендаровски се заблагодарил за интересот и поддршката на Обединетото Кралство за македонско-бугарскиот дијалог и подвлекол дека надминувањето на блокадата за почеток на пристапните преговори со Европската Унија ќе внесе дополнителна предвидливост и стабилност на Западниот Балкан.

Соговорниците, меѓу другото, разговарало и за одличната билатерална соработка меѓу Северна Македонија и Обединетото Кралство и можностите за зајакнување на соработката меѓу двете држави и за обезбедување натамошна британска поддршка во повеќе области и форми.