Зоран Заев ја презеде функцијата претседател на Владата на Северна Македонија

СКОПЈЕ (АА) - Новиот премиер Зоран Заев денеска во Владата официјално ја презеде функцијата од досегашниот технички премиер Оливер Спасовски, пренесува Агенција Анадолија (АА).

На официјалното примопредавање, Заев заблагодарувајќи му се на досегашниот премиер Оливер Спасовски и на членовите на преодната Влада за успешната работа во изминатите девет месеци, рече дека оваа Влада храбро и успешно се справи со здравствено-економската криза предизвикана од коронавирусот Ковид-19.

Во такви сложени услови, како што рече премиерот Заев, успешно се организирани и спроведени фер и демократски избори и избрана нова Влада.

Заев, исто така, подвлече дека државата ќе продолжи со реформските процеси и следствено на тоа сега е горда членка на НАТО Алијансата и ја остварува зацртаната ЕУ перспектива по добивањето на одлуката за почеток на преговорите со Европската Унија.

Посакувајќи му успешна работа на функцијата министер за внатрешни работи, премиерот Заев на Спасовски му посака плодна соработка и продолжување на совладувањето на предизвиците во ресорот, како и активно учество во работата на Владата во донесување на политики од интерес на сите граѓани на Република Северна Македонија.