Erbil Başay
09 Септември 2019•Ажурирај: 10 Септември 2019
БЕРЛИН (АА) - Министерот за надворешни работи на Германија, Хеико Мас, истакна дека треба да започнат преговорите за членство на Република Северна Македонија и Албанија во Европската Унија (ЕУ), јавува Anadolu Agency (AA).
Мас денеска во Берлин оствари средба со министерот за надворешни работи на Хрватска, Гордан Грлиќ Радман, по која се одржа прес-конференција.
Шефот на германската дипломатија говореше и за земјите од Западен Балкан.
„Северна Македонија и Албанија навистина постигнаа напредок. На овие земји треба да им понудиме убедливи ЕУ-перспективи и да ги започнеме преговорите за членство“, додаде тој.
Мас истакна дека оваа тема не е разгледана само во германската Влада, туку и во федералното Собрание.
Нагласувајќи дека од 1 јануари 2020 година Хрватска ќе претседава со ЕУ, додека Германија во втората половина на 2020 година, Мас рече дека затоа е важно овие две земји да имаат координација за темите кои се однесуваат на ЕУ.
