Burç Eruygur
16 Септември 2024•Ажурирај: 17 Септември 2024
ИСТАНБУЛ (АА) - Кремљ денес соопшти дека „играњето со оган има свои последици“ во врска со извештаите за поврзаноста меѓу Украина и осомничениот за очигледниот обид за атентат на републиканскиот кандидат и поранешен американски претседател Доналд Трамп што се случи вчера, известува Анадолу.
„Не е на нас да размислуваме за тоа, туку на американските разузнавачки агенции. Во секој случај, играњето со оган има свои последици“, одговори портпаролот на Кремљ, Дмитриј Песков, на брифингот со новинарите на прашањето дали Кремљ ги разгледал овие поврзувања.
Истакнувајќи дека Русија внимателно го следи развојот на настаните во Соединетите Американски Држави (САД), Песков рече дека ситуацијата околу претседателската трка е „напната“.
Тој го негираше мешањето на Русија во ситуацијата во земјата.
За нападот врз Трамп во неговиот голф-клуб во Вест Палм Бич, Флорида, американското Федерално истражно биро (ФБИ) објави: „Изгледа станува збор за обид за атентат.“
Официјални лица за спроведување на законот во Флорида им кажаа на новинарите дека уапсиле осомничен, кој го забележале агентите на американската тајна служба, со пушка АК-47 пред голф-клубот на Трамп.
Осомничениот е идентификуван како Рајан Весли Рут (58) од Хаваи, објавија „Њујорк тајмс“ и „Фокс њуз“, цитирајќи неименувани службеници од органите за спроведување на законот.
Претходно за „Њујорк тајмс“ Рут има изјавено дека заминал во Украина набрзо по започнувањето на „специјалната воена операција“ на Русија во февруари 2022 година за да ги охрабри луѓето да се борат за земјата.
