Започна младинскиот форум "Претставување на малцинствата во новите медиуми во Централна и Источна Европа”

СКОПЈЕ (АА) - Денес во Скопје започна одржувањето на младинскиот форум насловен ,,Претставување на малцинствата во новите медиуми во Централна и Источна Европа”, во организација на Асоцијацијата за едукација "Младиинфо Интернационал", поддржан од програмата Европа за граѓаните и Централно-европска иницијатива кој ќе трае два дена, од 3-4 март 2016 и на него ќе присуствуваат 50 млади луѓе од 14 земји на Централна и Источна Европа, вклучувајќи ја и Македонија, јавува Anadolu Agency (AA).

Форумот има за цел да открие како новите медиуми ги претставуваат малцинствата во овој регион и како тој процес придонесува за промоција на различностите. Во рамки на форумот ќе бидат презентирани резултатите од регионалиот мониторинг што беше спроведен врз 12 нови медиуми во Бугарија, Грција, Хрватска и Македонија, и кој треба да увиди како новите медиуми ги претставуваат етничките малцинства, мигрантите, бегалците, барателите на азил, како и лицата со телесна и интелектуална попречност и други.

Анализата на новите медиуми во регионов е прва од ваков тип и обезбедува како индивидуални, така и споредбени резултати за квалитетот на производите на новите медиуми во земјава и во регионов. Младите истражувачи ја следеа работата на новите медиуми во периодот јуни и јули 2015 година.

Марко Трошановски, главен истражувач на проектот за претставувањето на малцинствата во новите медиуми, вели дека резултатите од истражувањето покажуваат дека во македонските медиуми, односно на веб-сајтовите, малцинствата се повеќе претставени преку политичките теми, отколку преку теми кои обработуваат секојдневие и позитивна пракса во различни сфери.

"Она што е карактеристично за истражувњето од аспект како македонските веб сајтови покриваат малцински прашања е дека одбираат теми коишто се поврзани со политики, во врска со малцинствата, не доминираат теми коишто се однесуваат на секојдневниот живот на малцинствата, некои позитивни пракси на малцинствата во сферите на спортот, културата, уметноста, туку теми кои што се поврзани со односот на државните институции или политичките партии кон малцинските прашања" , истакна Трошановски додавајќи дека во случајот со Македонија, теми кои беа доминантни во македонските медиуми се всушност "теми кои доминантно го таргетираат албанското малцинство во Македонија, како и теми што не може да се избегнат, а се поврзани со мигрантската и бегалската криза".

Според агендата на форумот, освен резултатите од регионалниот мониторинг на нови медиуми, форумот ќе вклучува и четири панел дискусии. На панелите ќе учествуваат млади професионалци од земјите на Централна и Источна Европа, кои ќе ги претстават своите гледишта на темата.