Berk Kutay Gökmen
29 Октомври 2025•Ажурирај: 30 Октомври 2025
ИСТАНБУЛ (АА) – Јапонска туристичка агенција објави дека планира да започне со услуга за транспорт од точка до точка во 30-тите години, која ќе овозможи патување меѓу Токио и американски градови, како Њујорк, за само 60 минути преку вселената, објави новинската агенција Кјодо, јавува Анадолу.
Услугата, развиена во соработка со стартап компанија што се занимава со развој на повеќекратно употребливи ракети, ќе чини околу 100 милиони јени (приближно 657.000 долари) за повратен билет.
Возилото ќе полетува од локација надвор од копно и ќе може да ги поврзува кои било две точки на Земјата за помалку од еден час, според компаниите вклучени во проектот.
Првично целта е да се воспостави врска меѓу Токио и САД.
„Се надеваме дека овој бизнис ќе биде нов почеток во поврзувањето на вселенските патувања и туризмот“, изјави Кејго Јошида, претседател на компанијата Нипон Травел, на прес-конференцијата во Токио.
Пријавувањето за да се направат резервации однапред за услугата ќе започне во текот на 2026 година.
Проектот ќе се реализира во неколку фази - со дегустации на вселенска храна и тури во поврзани копнени капацитети што ќе започнат во 2026 година, а престоите во орбита се очекува да започнат во 40-тите години.
Во рамките на партнерството, Нипон Травел ќе биде задолжена за дизајнирање и промоција на поврзаните производи.
Претседателот на токиската стартап компанија „Иновативен вселенски носач“, Коджиро Хатада, изјави дека цел е да се намалат трошоците за патување преку зголемување на бројот на летови што може да ги изврши секое возило во текот на својот животен век.
