Ердоган: Турција им ги испорача првите домашни тенкови „Алтај“ на вооружените сили

ИСТАНБУЛ (АА) - Турција им ги испорача првите домашни тенкови „Алтај“ на своите вооружени сили, објави претседателот Реџеп Таип Ердоган денес на церемонијата на отворањето на објектот за производство на тенкови и оклопни возила од новата генерација „БМЦ Анкара“, јавува Анадолу.

„Алтај“ е новиот главен борбен тенк на Турција, а неговото масовно производство се одвива во фабриката на турскиот производител на автомобили БМЦ во Анкара.

Ердоган рече дека тенковите завршиле програма за тестирање од 35.000 километри и 3.700 вежби со боево гаѓање пред да ѝ бидат предадени на војската.

Претседателот додаде дека тенкот „Алтај“, надграден со напредни системи, е дизајниран да издржи најтешки услови на бојното поле.

Исто така, тој ја истакна масовната производствена линија на Турција, која се протега на 63.000 квадратни метри, велејќи дека секој месец ќе произведува осум тенка „Алтај“ и 10 оклопни возила „Алтуг“ - опишани како „тврдини на бојното поле“.

„Продолжуваме да пишуваме легенда со нашите најсовремени воздушни, копнени и морски возила“, рече Ердоган.

„Ние повеќе не сме само држава што следи, ние сме држава што е следена“, додаде тој.