Студија го поврзува изумирањето на диносаурусите со астероидот „Тип-Ц“ богат со јаглерод

ИСТАНБУЛ (АА) - Нова студија укажува дека ударот кој го предизвикал создавањето на кратерот Чиксулуб, кој придонел за истребување на диносаурусите, бил предизвикан од астероид од типот Ц богат со јаглерод, јавува Анадолу.

Кратерот Чиксулуб, кој се наоѓа во близина на полуостровот Јукатан во Мексико, е еден од најголемите кратери на Земјата предизвикани од удар на небесно тело. Тој има дијаметар од 200 километри и длабочина од 20 километри. Се верува дека е предизвикан од астероид со широчина од околу 10 километри.

Астероиди од типот C, богати со јаглерод и за кои се верува дека се формирале во надворешните делови на раниот Сончев Систем, сега можат да се најдат во астероидниот појас помеѓу Марс и Јупитер. Овие астероиди биле распространети кога Јупитер се поместил во раниот стадиум од историјата на Сончевиот Систем.

Истражувачите од Универзитетот во Келн, и коавторот Марио Фишер-Год, анализираа слој на материјалот депониран во светот по ударот пред 66 милиони години. Тие се фокусираа на рутениумот, редок метал на Земјата, за да го идентификуваат составот на астероидот.

Примероците од Данска, Италија и Шпанија го покажаа истиот „потпис“ на рутениум, потврдувајќи дека металот потекнува надвор од Земјата и исклучувајќи ги теориите дека вулканските ерупции придонеле за присуството на металот.

„Рутениумот во овој слој е речиси целосно од астероидот“, истакна Фишер-Год.

Крег Волтон од Универзитетот во Кембриџ, кој не е вклучен во студијата, смета дека истражувањето ветува многу, но истакна дека сè уште е неизвесно дали небесното тело било астероид или комета.