Mehmet Alaca
26 Август 2021•Ажурирај: 01 Септември 2021
АНКАРА (АА) - Научниците открија дека во последниве години, загадувањето на светлината доведе до загрижувачко намалување на бројот на инсектите, пренесува Агенција Анадолија (АА).
„Би-би-си“ (BBC) објави вест базирана врз студија спроведена во Велика Британија, која открива дека уличните светилки го нарушуваат однесувањето на ноќните молци и за половина го намалуваат бројот на гасеници.
Во оваа студија, објавена во „Science Advances“, истражувачите предупредуваат дека загадувањето на светлината може да има штетно влијание врз локалната популација на инсекти, како и негативни последици за птиците кои се хранат со гасеници и други видови инсекти.
Во текстот се наведува дека практичните решенија што не ја загрозуваат јавната безбедност, како што се затемнувањето на уличните светла во раните утрински часови, инсталирањето сензори за движење или користењето филтри во боја, би можеле да ги намалат постоечките штети.
Во истражувањето се забележува дека пчелите, мравките и тврдокрилестите инсекти угинуваат осумпати побрзо од цицачите, птиците или влекачите, додека другите видови како што се мувите и лебарките најверојатно брзо ќе се размножуваат.
Во текстот се наведува дека и популацијата на инсекти се намалува поради климатските промени, исчезнувањето на природните живеалишта и пестицидите.
И научното истражување спроведено во 2019 година, исто така укажа на сериозниот пад на бројот на инсекти низ светот.
Инсектите се извор на храна за голем број птици, водоземци, лилјаци и влекачи и играат важна улога во опрашувањето на растенијата. Поради тоа, исчезнувањето на инсектите предизвикува далекусежни последици врз екосистемите.
