Источна Гута: Во нападите на режимот на Асад загинаа 40 цивили

ИСТОЧНА ГУТА/АНКАРА (AA) - Најмалку 40 цивили загинаа во нападот на Режимот на Башар ал-Асад и неговите приврзаници на пазарот во областа Кефер Батна во Источна Гута, јавува Anadolu Agency (AA).

Според информациите добиени од претставниците на Цивилната одбрана (Белите шлемови) во Источна Гута, силите на режимот и поддржувачот Русија продолжуваат да ја напаѓаат Источна Гута и покрај одлуката за прекин на огнот на Советот за безбедност на ОН.

Воените авиони на режимот и неговите приврзаници бомбардираа пазар кој се наоѓа на главниот пат во областа Кефер Батна, Источна Гута.

Стотици цивили беа повредени, додека 40 цивили ги загубија животите во нападот врз преполн пазар, каде што луѓето се обидуваа да избегаат во внатрешните делови на Источна Гута.

Тимовите на цивилната одбрана изјавија дека труповите не можеле да се отстранат поради непрекинато бомбардирање и дека не можело да се стигне и до ранетите лица.

Советот за безбедност на ОН, со усвојување на Резолуцијата на 24 февруари, побара да се прогласи хуманитарно примирје за цивилите низ Сирија, пред сè, во Источна Гута. Но не беше дефинирано како ќе биде спроведено барањето за спроведување итен прекин на огнот. Русија, по одлуката на СБОН, на 27 февруари соопшти дека во периодот од 9:00 до 14:00 часот, секојдневно воведува хуманитарен прекин на огнот, тврдејќи дека режимот ќе ја почитува оваа одлука.

Најмалку 400 илјади луѓе во Источна Гута, под контрола на опозицијата, живеат под блокада веќе 5 години. Кризата во регионот секојдневно се продлабочува, а илјадници болни цивили чекаат да бидат евакуирани.

Поголем дел од нив се деца или болни од рак во напредна фаза. Голем број деца во Источна Гута починаа поради глад и недостаток на лекови.