Fuat Kabakcı
04 Февруари 2021•Ажурирај: 05 Февруари 2021
АНКАРА (АА) - Делегацијата на Светската здравствена организација (СЗО), која го истражува потеклото на новиот тип коронавирус, соопшти дека кинеските официјални претставници соработуваат за време на теренската работа во Вухан, пренесува Агенција Анадолија (АА).
Членот на делегацијата и експерт за зоологија, Петер Дасзак, на Твитер напиша дека за време на истражувањата и работата на терен во Вухан извршиле низа значајни состаноци со вработените на Институтот за вирологија во Вухан (WIV), меѓу останатите и со помошник-претседателката на таа институција, Ши Зенгли, и дека кинеската страна соработува со нив.
„Имавме исклучително значаен состанок, вклучувајќи ја и средбата со Ши Зенгли. Многу срдечно и отворено е разговарано за сѐ. Поставени се клучни прашања на кои добивме одговори“, наведе Дасзак.
Тој во друга објава сподели слики од просторот надвор од Институтот.
„Им благодарам на медиумите што се трпеливи за ова прашање, како и за нивниот интерес. Истражувањата напредуваат и ние сме нестрпливи што побрзо да разговараме за резултатите“, појасни тој.
Институтот е основан откако во 2002 и 2003 година се појави тешкиот акутен респираторен синдром (САРС), а со цел добивање информации за коронавирусот. Стана предмет на неколку теории дека Ковид-19 таму е произведен и по грешка изнесен во надворешниот свет.
Кинеските официјални претставници ги отфрлија таквите тврдења и наведуваат дека Ковид-19 се појавил и е увезен од другите земји по морски пат, но тоа сѐ уште не е потврдено.
Кина претходно го отфрли барањето на американската администрација за започнување истрага за потеклото на вирусот. Откако Австралија во април 2020 година ја повика СЗО на започнување меѓународна истрага, воведени се ограничувања во врска со извозот во таа земја.
По меѓународните притисоци, формиран е меѓународен тим кој се состои од експерти од САД, Австралија, Германија, Јапонија, Велика Британија, Русија, Холандија, Катар и Виетнам. Делегацијата на почетокот на јануари отпатува во Кина, но администрацијата на Пекинг предупреди дека не ги добила потребните визи, поради што тимот мораше да се врати назад.
По добиените дозволи, тимот од експерти со приватен авион допатува на 14 јануари, а во Кина помина 14 дена во карантин, и за време на тој период одржа низа состаноци онлајн.
Делегацијата со работата на терен започна на 29 јануари, а го посети и пазарот во Вухан, кој се поврзува со првите случаи на заразување, како и неколку болници и други здравствени установи.
