Во Шпанија продолжува рекордниот раст на смртни случаи и новозаразени со Ковид-19

МАДРИД (АА) – Во Шпанија, во последните 24 часа, од коронавирусот Ковид-19 починаа уште 514 лица, со што вкупниот број на починати се искачи на 2.696 лица, а бројот на случаи се зголеми за 6.584, искачувајќи се на 39.673, пренесува Агенција Анадолија (АА).

Министерството за здравство на Шпанија ги ажурираше информациите за Ковид-19.

Соодветно на тоа, бројот на лица што го загубија животот во епидемијата се зголеми од 2.182 на 2.696 со рекордно зголемување од 514 смртни случаи, а бројот на заболени порасна од 33.089 на 39.673 што претставува рекорден раст од 6.584 нови случаи.

Според овие податоци, во последните 24 часа е регистриран најголем број смртни случаи и дијагностицирани со Ковид-19 во земјата.

Министерството најпрво објави дека бројот на починати е 2.694, а потоа за кратко време ја зголеми бројката на 2.696.

Бројот на пациенти што се лекуваат од Ковид-19 во Одделот за интензивна нега е 2.636, а во последните 24 часа излекувани се 439 пациенти, така што вкупната бројка на излекувани се искачи на 3.794.

Од 19 март бројот на починати од Ковид-19 во Шпанија се зголемува.

Според статистичките податоци, на 19 март имало 169 смртни случаи, на 20 март 215, на 21 март 344, на 22 март 394, на 23 март 462 и денес 514 случаи.

Од друга страна, бројот на починати во Автономниот Регион Мадрид се зголеми на вкупно 1.535, а во последните 24 часа имало 272 лица починати од Ковид-19. Бројот на заболени се зголеми за 1.777 и се искачи на вкупно 12.352.

По Мадрид, најголема смртност е забележана во автономните администрации Каталонија (282) и Кастилја ла Манча (212).

Шпанскиот премиер Педро Санчез во изјавата во неделата рече дека оваа седмица ќе има серизно зголемување на бројот на смртни случаи и дијагностицирани со Ковид-19 и упати повик до јавноста психолошки да се подготви за оваа ситуација.