Ayhan Şimşek
22 Октомври 2020•Ажурирај: 02 Декември 2020
БЕРЛИН
Во Германија денеска се регистрирани рекордни 11.287 нови случаи на Ковид-19, јавува Агенција Анадолија (АА).
Ова е првпат од почетокот на пандемијата во Германија да има повеќе од 10.000 заразувања во еден ден.
Според бројките објавени од Институтот „Роберт Кох“, бројот на случаи на Ковид-19 во текот на изминатите 24 часа се зголеми за повеќе од 3.500, при што вчерашната бројка изнесуваше 7.595.
Локалните здравствени власти забележаа 30 нови починати во текот на изминатиот ден, со што бројот на починати од пандемијата изнесува 9.905.
Германскиот министер за здравство, Јенс Шпан вчера објави дека е позитивен на Ковид-19 и дека се наоѓа дома во карантин.
Соседните земји на Германија - Франција, Холандија, Швајцарија, Австрија и Полска и Чешка, исто така забележаа зголемување на бројот на случаи на Ковид-19 на дневно ниво, и поради тоа властите се принудени да воспостават нови рестриктивни мерки со цел спречување на вирусот.
