Американскиот потпретседател во живо на ТВ ја прими вакцината против Ковид-19

ВАШИНГТОН (АА) - Потпретседателот на Соединетите Американски Држави (САД), Мајк Пенс, неговата сопруга Карен Пенс и шефот на Службата за јавно здравство на САД, Џером Адамс, со сопругата во живо во телевизиска програма примија вакцина против коронавирусот (Ковид-19), развиена од компаниите „Фајзер“ и „БајоНТех“, prenesuva Агенција Анадолија (АА).

Брачните парови Пенс и Адамс изјавија дека се вакцинирале на овој начин со цел да ги охрабрат жителите на земјата да се вакцинираат, додавајќи дека веруваат во оваа вакцина и дека само преку вакцинацијата може да се запре пандемијата.

Американскиот потпретседател рече дека за само неколку часа Управата за храна и лекови на САД (ФДА) би требало да ја одобри вакцината и вакцината против Ковид-19 развиена од „Модерна“.

„Овде сме за да покажеме доверба во однос на вакцината“, рече Пенс.

Истакнувајќи ја важноста на вакцината во борбата против пандемијата, Пенс рече дека се наоѓаат пред клучен пресврт во борбата против коронавирусот.

„Гледаме светло на крајот од тунелот“, истакна Пенс.

Се очекува и новоизбраниот претседател на САД, Џо Бајден, следната недела исто така ќе се вакцинира пред камерите.

Сè уште не е познато кога претседателот во заминување, Доналд Трамп, ќе биде вакциниран против Ковид-19.