„Пациентите болни од рак можат безбедно да ја примат вакцината Коронавак“

АДАНА (АА) - Кинеската вакцина „Коронавак“, што се применува против коронавирусот во Турција, не претставува ризик за пациентите што боледуваат од рак, вели турски лекар, јавува Агенција Анадолија (АА).

Тимучин Чил, кој работи на научно истражување на Клиниката за медицинска онкологија во болницата за обука и истражување во Адана, рече дека пациентите со рак се меѓу ризичните групи кога станува збор за новиот тип коронавирус.

„Пациентите болни од рак можат безбедно да ја примат инактивираната вакцина. Многу е безбедна и не претставува ризик за нив. Нејзината имплементација е јасно препорачана од сите регулативи низ светот“, изјави Чил.

„Коронавак вакцината може да се користи безбедно. Вакцините што ги користиме против грип се исто така инактивирани вакцини. Не претставуваат ризик за пациентите болни од рак“, додаде тој.

Нагласувајќи дека инактивираната вакцина „Коронавак“ се користи во Турција, Чил изјави: „Знаеме дека ова е погоден вакцинациски метод за пациентите болни од рак. Сега знаеме дека Американското здружение за рак, Европското здружение за медицинска онкологија и Турското здружение за медицинска онкологија јасно ја предлагаат вакцинацијата. Сите пациенти со рак мора да бидат вакцинирани.“

Тој исто така нагласи дека постојат две групи пациенти со рак. Првата група се пациенти кои не примаат активен третман и овие пациенти мора веднаш да се вакцинираат кога ќе дојде редот.

„Втората група пациенти се оние што добиваат активен третман, како што се операција, хемотерапија, имунотерапија, радиотерапија“, додаде тој.

„Овие пациенти исто така треба да се вакцинираат, но кога имуниот систем е потиснат за време на хемотерапијата, треба да се земе предвид мислењето на нивните онколози пред вакцинацијата“, рече Чил.

Тој рече дека пациентите со карцином над 85 години се вакцинираат во согласност со програмата за вакцинирање на Министерството за здравство.